مبدئيا كده ॥ انا ماليش اصلا فى الكورة ولا هى من اهتماماتى بالمرة
بس بصراحة الحركة دى عجبتنى قوى لما شفتها فى التلفزيون
الحقيقة انا كنت متغاظ جدا من الناس اللى قاعدين يتفرجوا على الماتشات
و سايبين الدنيا تولع فى غزة
و سايبيين مليون و نص انسان مهددين بالموت
و هما قاعدين يتفرجوا على الكورة
و انا دمى بيتحرق
قلت لواحد منهم
طب ياعم حتى اتفرج على النشرة شوف ايه اللى بيحصل
يقولى بعد الماتش بعد الماتش
اقوله ياعم اعمل اى حاجة
يقولى استنى بس مصر بتلعب
يا ابويا مصر بتلعب و غزة بتموت اتحرك
طب بص هات اتنين جنيه تبرع نجيب بيهم دوا للمرضى هناك
يا عم اللى يعوزه البيت يحرم على الجامع
فى وسط هذا الجو المساطيلى ووسط الاف المغيبين المتعلقة عيونهم بشاشة التلفزيون و ارجل اللاعبين
و كأن دا اكل عيشهم لقيت واحد اسمه ابو تريكة طالع فى التلفزيون و بيقول لهم حسوا على دمكم
انتوا قاعدين كده و الناس فى غزة بتموت
خلوا عنكم دم فوقوا بقى من السطل اللى انتوا فيها قبل ما تبقوا مكانهم مش لاقيين اللقمة
حتعمل لكم ايه الكورة حتاكلكم و تشربكم حتعالجكم حتشفعلكم يوم الحساب لأ
هى بس حتغيب عقولكم و تملا دماغكم بالتفاهات
الكورة ما هى الا افيون للشعوب تتعاطاه من ايد الحكومات بانتظام لتضمن عدم افاقتها من النوم العميق اللى هى فيه
بس ربنا بعت واحد زى ابو تريكة و كانه طسهم بجردل مية فى وشهم بس يا رب يكونوا فاقوا
الجميل فى الموضوع بقى ان بعض المساطيل الاشد سطلا اعترضوا على ابو تريكة و قالوا ان خالف اللائحة اللى مش عارف ايه للفيفا
و انه المفروض يتعاقب و كمان هو كده بيضر مصر كلها لانه بيعرض نفسه للايقاف فى حين ان مصر محتاجاله فى البطولة
وو الله العظيم لا اجد ما ارد به على هذا الكلام الا ان اقول حسبى الله و نعم الوكيل
يعنى مش عايزين من وسط الاف المساطيل دول كلهم واحد بس يطلع فايق
تحديث
اشمعنى ماحدش اتكلم على الصورة دى .... يا ناس خلو عندكو دم
هناك تعليق واحد:
يا حرامي الأفكار... الصوره دي من عندي... حاتروح النار كده
إرسال تعليق