جنب الحيط: يا إحنا يا هما

كلام غريب اليومين دول بنسمعه بمناسبة موضع استخراج البطاقة الانتخابية و تسمع تعليقات الشباب حوالين استخراجه للبطاقة الانتخابية غريبة، الى يقولك و انا مالى ولا الى يقول ماهى خربانه خربانه وواحدة تقول احمد زي الحج احمد اتعب نفسي عشان ارشح واحد منافسه لا يختلف عنه في شيء كلهم لصوص بلا نيلة.. ! وواحد بقى غرق فى الامبلاة لحد شوشته سمعته بيقول
"بطاقة إيه يا عمنا .. ما تكبر دماغك و تنضف مخك .. قال إنتخابات قال! دي كلها طبخة كوسة يابا .. عاوزني أروح أبهدل نفسي وكرامتي تتبعتر؟! "

يا ساتر يارب ..ايه ده.. بالزمة ده كلام ناس عاقلين ...!

الناس بصه لموضوع الانتخابات ده بصه تحزن و الله....

و كأن البلد دى مش بلدهم ... مش عارف ايه الى وصلنا للدرجة دى...! يمكن من اللى العالم شيفاه فى شمصر ...ماهى الوجوه مابتتغيرش ..يعنى خد عندك مثلاً ..وزير من الوزراء فى مصر بقاله فى الوزاره 45 سنة ....مستغربين ليه والله العظيم بقاله فى الوزارة 45 سنة ...وكل ماابص على حالة زى حالة اخينا ده استغرب ..يعنى ايام الاتحاد الاشتراكى ...كان كبير الاشتراكين ...و لما جه حزب مصر بأتجاهه الرأس مالى بقى زعيم فى الرأسمالية ...و لما أصبح الحزب الوطنى على الحكم ..بأتجاهه المايع الى ماتعرفلهوش ان كان رأس مالى و لا اشتراكى ..هو حاجة كده مش معروفلها اتجاه... صاحبنا ده يعد اكبر المدافعين عن الاتجاه الى مش معروفله اسم ده ...و انا متـأكد ان الاتجاه الاسلامى لو قدر ليه ووصل للحكم...صاحبنا ده هتلقيه واقف فى مجلس وعمال يهاتى فى المجلس عن مميزات الحكم الاسلامى....!!

و لا ممكن تكون السلبية دى نتيجة لأن الشباب و لا شعوبنا عموماً مامرستش عملية انتخابية طول عمرها ..ولا يمكن من 60 سنة مثلاً يمكن....!
حتى الانتخابات الى بتتعمل فى الجامعة ( هو طبعاً مافيش انتخابات فى المدارس حالياً ) حاجة كده فيها من صفات الميه الكتير لا ليها طعم ولا لون و لا ريحه ( برغم إن الميه فى مصر ليها لون و طعم و ريحه ) المهم ...انتخابات الجامعة فى مصر حاجة كده كوميدية يعنى يعلن عن فتح باب الترشيح للانتخابات و الى يترشح تبقى امه داعيه عليه ...يتشطب ..ده اقل مافيها...ممكن يتعمله مجلس تأديب و يشيل مادتين عقوبة و لا يتفصل شهر او اسبوع... و لو امه داعيه عليه فى يوم جمعه تبقى وقعته لامؤخزة اسود من قرن الخروب... يستدعوه فى امن الدوله هو و أبوه و أمه و اخواته (تقولش طالعين مصيف ) و يسمع بقى من الوعيد و التهديد و الويل و الثبور و عظائم الامور ...و ساعته بقى ابوه يخاف عليه و يحوله من الكلية لمعهد فنى صحى ولا معهد تمريض سنتين ...

بس يا جماعة الدنيا من حوالينا بتتغير و دول كانت حالتها اطين من حالتنا ...و اتغيرت و بقى عندها انتخابات ..و مستوى المشاركة الانتخابية عندهم فى قمة معدلاته ...
و الاهم من كده احنا عندنا فى مصر فرصة للتغير فى الفترة الى احنا فيها دى من الممكن انها ماتتكررش الا بعد قول مثلاً 30 ولا 40 سنة ...يدينى و يديك طولة العمر...!

الواحد كل مايفتكر مناظر الناس فى اوكرانيا مثلاً و هما واقفين فى التلج فى درجة حرارة 10 تحت الصفر تصورو الاحتجاجات و الاعتصامات استمرت اكتر من شهر...و ايه عواجيز و شباب ..بنات و رجاله ...و اطفال كما و كله بيشارك ..ماهى البلد بلدنا ولازم نلحقها...!

و ايه الى حصل... التغير تم غصب عن عين التخين.. ليه؟! ...لأن الناس عايزه تغير ...و عايزه تمارس انسانيتها و آدميتها فى انها تختار.. !

كل ده و لسه فى واحد انا سمعه اهو بيقول و انا مالى ...سمعك ..بس انا بقى مش هبقى زيك ...و هطلع البطاقة و هروح انتخب و هاخد معايا اخواتى الكبار و الصغيرين ...البنات قبل الرجاله ...حتى ستى عديله الى عندها 95 سنة ...هاخدها فى تاكسى و هروح بيها اللجنة تنتخب...لأنها اصلاً معاها بطاقة انتخابية من 70 سنة ...ايه رأيك بقى ...!!

زائد كمان انا مابكلمكش انتى... انا بكلم الراجل الى قاعد جنبك الى قالى قبل ماأكلمكو انه ناوى يطلع البطاقة و يروح ينتخب ... سمعنى سكاتك بقى ...!!!

طلعو البطاقة و قولو لأ أو نعم... بس المهم تحس انك عايش...

مارس حقك انك تكون انسان محترم...

ماتسبش الهليبه و بتوع المصالح يختارو ليك حياتك

ولا يحددو ليك مصيرك....

روح القسم ...و بقولك اهو ..من اولها ... هتلاقى واحد رزل و رخم و بلط مش عايز يطلعهالك موظف من موظفى القسم ...و هيخوفك و هيسألك اسألة بايخه زيه..هطلعها ليه...؟! ..و هتنتخب مين ؟!.... و انت تبع مين بالظبط ؟!...

شخصية قميئة حطينه علشان يخوف الناس من انها تحس بذاتها

روح ..و لو رخم عليك رخم عليه...و لو رزل قيراط رزل عليه 24 فدان...و بجح فيه صدقنى هيخاف و يكش و يعملهالك!!!

روح و سيبها على الله ... و غير علشان ربنا يغير

ماهو مش معقول بوركينا فسو و النيجر و السنغال و جزر فيشى ...كل دول عندهم انتخابات و بيشركو فيها و لامؤخزة اجعصها دولة من الدول دى مصر تفصل منها 4 دول و كمان صديرى و لا سروال.... !

روح انتخب و هتلاقى قدام اللجنة بتاعة الانتخابات ظابط لا مؤاخذة قد الدولاب ...روح و قوله بكل ادب ممكن ادخل انتخب ..امارس حقى فى انى اكون انسان محترم... هيقولك امشى ياد بعيد ... امش و متبجحش معاه و قول فى سرك " حسبنا الله و نعم الوكيل " ساعتاه صدقنى هتحس انك انسان بتمارس حق بيمارسه ناس فى دول تانية ماكنتش اصلاً موجودة من 100 سنة و مع ذلك فيها انتخابات و الناس فيها لما بتحب تغير بتغير .....

اسمع .... لو ماطلعتش البطاقة فى لسه قدامك فرصة الكام يوم الى جاين دول لحد 31 يناير ...خد معاك صورة البطاقة الشخصية و قلم ازرق ...و بالمرة خد معاك اتنين زمايلك ولا جيرانك يطلعو بطاقات انتخابية زيك..!