إهداء الى شعب مصر بقلم محمدحسنى مبارك

يا شعبى حبيبى ياروحى يا بيبى
يا حاطك فى جيبى يا بن الحلال
يا شعبى يا شاطر يا جابر خواطر
يا ساكن مقابر و صابر و عال
يا واكل سمومك يا بايع هدومك
يا حامل همومك و شايل جبال
يا شعبى يا نايم و سارح و هايم
وفى الفقر عايم و حاله دا حال
احبك محشش مفرفش مطنش
و دايخ مدروخ و آخر إنسطال
احبك مكبر دماغك مخدر
ممشى امورك كده بالتكال
و احب اللى ينصب و احب اللى يكذب
و احب اللى ينهب و يسرق تلال
و احب اللى شايف و عارف و خايف
وبالع لسانه و كاتم ما قال
و احب اللى قافل عيونه المغفل
و احب البهايم و احب البغال
و احب اللى راضى و احب اللى فاضى
و احب اللى عايز يربى العيال
و احب اللى يائس و احب اللى بائس
و احب اللى محبط و شايف محال
و احبك تسافر و تبعد تهاجر
وتبعت فلوسك دولار او ريال
و احبك تطبل تهلل تهبل
عشان ماتش كورة و فيلم و مقال
و احبك تأيد تعضض تمجد
توافق تنافق و تلحس نعال
تحضر نشادر تجمع كوادر
تلمع تقمع تظبط مجال
لكن لو تفكر تخطط تقرر
تشغل دماغك و تفتح جدال
و تبدأ تشاكل و تعمل مشاكل
و تنكش مسائل و تسأل سؤال

و عايز تنور و عايز تطور
و تعملى روحك مفرد رجال
ساعتها حجيبك لا يمكن حسيبك
وراح تبقى عبرة و تصبح مثال

أحمد فؤاد نجم