تعرف ايه هو الدافع وراء الهجرة ؟
السؤال دا طرحته على ناس كتير جدا , كتير منهم متعلمين , خريجين جامعات , مسلمين متديينين او لا او حتى مش مسلمين خالص .
و الاجابات اللى حصلت عليها كانت غريبة جدا جدا .....
- الرسول هاجر علشان ( يهرب ) من الكفار اللى كانوا عاوزين يقتلوه
- لا دا هاجر علشان يحمى نفسه و يحمى المسلمين من التعذيب
- لا هو فى الحقيقة مالقاش فايدة من الجماعة الكفار بتوع مكة قال جرب فى حته تانية
- بصراحة مش عارف يا عم انا مالى ؟؟
- هجرة مين ؟؟ انت لسه عايش فى ايام الهجرة ؟؟
دى كانت بعض الاجابات اللى حصلت عليها و غيرها ما تختلفش عنها كتير
فى الحقيقة دى كانت صدمة لى . لكن حاولت اسهلها لهم شوية فسالتهم سؤال تانى
طب ليه التقويم بتاعنا الاسلامى بيقولوا عليه التقويم الهجرى . و ليه اصلا بدأ التقويم من هجرة الرسول مش من ميلاده مثلا او من وفاته و كده يعنى ؟
المرة دى قى كانت الاجابة واحدة و بالاجماع ... مش عارف .
للاسف كتير مننا عارف تاريخ الفراعنة و تاريخ امريكا و اوروبا و حتى تاريخ ثورة يوليو المجيدة
لكن معلوماتنا عن التاريخ الاسلامى بسيطة جدا وحتى فهمنا ليها فهم مشوه و مغلوط
و السبب فى كده و الله اعلم هى مناهج التعليم المتخلفة اللى احنا بنتعلمها و اللى بتنتج عندنا هذا الكم من الجهل و المعلومات الخطا
و ممكن يكون الموضوع ده مقصود بيه اهداف معينة ... ان مثلا الاجيال اللى جاية ما يكونش عندها فهم الاسلام زى اللى كان عند الرسول و الصحابة و بالتالى ممكن بعد كده نقولهم ان الاسلام هو عبادات وصلاة و صيام و صدقات بس
او ان الاسلام هو لحية و نقاب و توحيد وعذاب القبر و خلاص او ان الاسلام هو حب اهل بيت النبى صلى الله عليه و سلم او ان الاسلام هو اخلاق طيبة بس و مش مهم اى حاجة تانية
فى الحقيقة ان الاسلام يشمل الحاجات دى و اكتر منها كتير لكن احنا محتاجيننفكر شوية علشان نعرف الرسول و صحابته الكرام فهموا الدين ازاى ساعتها نقدر نعرف ايه الدافع وراء الهجرة من مكة الى المدينة .
شوف يا سيدى ... الهجرة من المدينة كان ليها هدف رئيسى و هو بناء الدولة الاسلامية
هو ده والله العظيم هو السبب الحقيقى وراء الهجرة و انا عايزك تفكر معايا شوية .
لو كانت الهجرة للناس اللى مش قادرة تتحمل التعذيب امال ليه واحد زى عمر بن الخطاب يهاجر فى عز الدهر و يقول للكفار انا مهاجر بكرة يا كفار ياولاد ال... كفار هو دا بالذمة كلام واحد هربان طبعا لا حد يصدق ان عمر ممكن يهرب
او حمزة او على بن ابى طالب و بعدين ما عندهم الحبشة و الملك النجاشى بيحميهم فيها و اخوانهم قاعدين هناك و آخر حلاوة ايه اللى كان يوديهم المدينة ...
و بعدين اللى بيقولوا ان الرسول كان خايف من القتل .... امال ايه اللى خلاه يفضل قاعد فى مكة لحد ما كل الصحابة دول هاجروا و بعدين دا باعت سيدنا مصعب من قبلها بسنة علشان ينشر الدعوة هناك يعنى بيجهز البلد لحاجة مهمة مش مجرد لجوء خوفا من القتل
بيجهز المدينة علشان حتكون هى المركز اللى حينتشر منه الاسلام فى العالم كله . و حتكون هى عاصمة الدولة الاسلامية و مركز الحكم الاسلامى .
كلام معقول مش كده ؟؟ و طبيعى و منطقى كمان ان رسول و صاحب دعوة ناوى ينشرها فى العالم كله مش ممكن يعمل الموضوع دا بشكل فردى لازم يكون فى دولة مسلمة و حكومة مسلمة تكون مسئولة عن نشر هذه الدعوة و رعايتها فى العالم كله و طبعا اللى يقرأ كلام العلماء فى هذا الموضوع يعرف ان وجود الدولة و الحكومة الاسلامية هو فريضة دينية
زى الصلاة و الصيام ... و ان عدم وجودها هو منكر عظيم بل دا اكبر منكر يجب ازالته
و ما حدش يقولى ما هو فيه دول اسلامية كتير و الاسلام هو مصدر التشريع الاساسى فيها .. كلنا عارفين مين اللى بيحكم الدول دى و ايه نظامهم بالظبط ولو كانت دى حكومات اسلامية فعلا كانت تبقى زى حكومات الخلفاء الراشدين
متهيألى كده مش ممكن حد يسأل هما ليه ماقالولناش الحكاية دى فى المدرسة لما حكوا لنا حكاية الهجرة وليه الكلام دا مش موجود فىكتب التاريخ المدرسية ؟؟؟؟؟...
لو مش عارف لسه الاجابة عن السؤال دا يبقى اقرأ المقال من الاول تانى يمكن تعرف الاجابة ..
